ഇടുക്കി ജലവൈദ്യുത പദ്ധതിയിലെ അറ്റകുറ്റപ്പണിയുടെ ഭാഗമായി കേരളത്തില്‍ ഏര്‍പ്പെടുത്തിയ ലോഡ്ഷെഡിങ് പിന്‍വലിച്ചതായി വൈദ്യുതി മന്ത്രി എ.കെ. ബാലന്‍ അറിയിച്ചു. ഇടുക്കിയിലെ അറ്റകുറ്റപ്പണികള്‍ പൂര്‍ത്തിയായതിനെ തുടര്‍ന്നാണിത്. ഇന്നു വൈകുന്നേരത്തോടെ ഇടുക്കിയില്‍ വൈദ്യുതോല്‍പാദനം പുനരാരംഭിക്കും. ഇടുക്കി ജലവൈദ്യുതി പദ്ധതിയുടെ അറ്റകുറ്റപ്പണികള്‍ക്കായി കഴിഞ്ഞ തിങ്കളാഴ്ച മുതലാണ് സംസ്ഥാനത്ത് ലോഡ്ഷെഡിങ് ആരംഭിച്ചത്. ഈ മാസം 16 വരെ ലോഡ്ഷെഡിങ് ഉണ്ടാകുമെന്നാണ് അറിയിച്ചിരുന്നത്.ഇടുക്കി ജലവൈദ്യുതപദ്ധതിയുടെ അറ്റകുറ്റപ്പണി വെല്ലുവിളിയായി ഏറ്റെടുത്ത വൈദ്യുതി ബോര്‍ഡിലെ ഉദ്യോഗസ്ഥര്‍ ഇത് തൃപ്തികരമായി പൂര്‍ത്തിയാക്കിയെന്ന് വൈദ്യുതി മന്ത്രി എ കെ ബാലന്‍  പറഞ്ഞു. ഒരു മാസത്തോളം വേണ്ടി വരുമായിരുന്ന ജോലി ജീവനക്കാര്‍ വെല്ലുവിളിപോലെ ഏറ്റെടുത്ത് അതിവേഗം പൂര്‍ത്തിയാക്കുകയായിരുന്നെന്നും മന്ത്രി പറഞ്ഞു.

ഒരുമാസത്തോളം വേണ്ടിവരുമെന്ന് കണക്കാക്കിയിരുന്ന ജോലി ഇരുനൂറോളം ജീവനക്കാര്‍ മൂന്നു ഷിഫ്റ്റായി ചെയ്ത് 10 ദിവസംകൊണ്ട് തീര്‍ത്തു. 1976ല്‍ ഇടുക്കി പദ്ധതി കമീഷന്‍ ചെയ്തശേഷം ഇന്‍ടേക്ക് വാല്‍വ് അടച്ചുള്ള അറ്റകുറ്റപ്പണി ഇതുവരെ നടത്തിയിട്ടില്ല. അതായിരുന്നു അറ്റകുറ്റപ്പണിക്ക് ജീവനക്കാര്‍ക്ക് മുന്നിലുയര്‍ന്ന വെല്ലുവിളി.